Ongi etorri Mr. Marshall

By | 2004/06/19

Aste honetan bisitari ilustreak izan ditugu gurean eta batzuoi tokatu zaigu cicerone kulturalarena egitea. Kontua da Marshall fundazioak etorkizuneko aitzindari estatubatuar batzuk ekarri dituela Europa ezagutzera, bere fellowship programa transatlantikoan. Bai, mundu gerraren osteko Marshall plan haren ondorengoa den fundazioak halako Erasmus labur moduko bat antolatzen du eta kontinenteko geldiuneetako bat Bilbo zen euretako zazpirentzat. Unesco etxeak egitaraua prestatu zien gurean eta, besteak beste, Gernika bisitatzea eta Kafe Antzokia ezagutzea egokitu zitzaien.

Ilustreak ezezik, ilustratuak ere baziren, bakoitzaren kurrikulumari begirada bat botatzea besterik ez zegoen horretaz ohartzeko. Denok geunden urduri ea zer nolako pajaroak zetozkigun, ez baitzuten zertan hizkuntza eta kultura gutxituekiko sensibilitaterik izan. Ezinezkoa zitzaigun Berlangaren filmaz ez gogoratzea eta barre dexente egin dugu egunotan, baina azkenean, jende normala ziren gehienak, nahiko irekiak eta ikasteko prest zeuden.

Batzuek bitakorak dituzte, Dave Ramaswamy-k edo Sanjay Parekh-ek kasu eta, nik bezala, biek Movable Type erabiltzen dute, kasualitatea?

Bidaiaren bitakora ari da egiten Sanjay eta oso ondo jarri gaitu bertan. Antza, Ibarretxerekin biltzeak baino eragin handiagoa egin die Zenbat Gara bisitatzeak, euskalgintzaren berri izateak eta gurekin afaltzeak. Tira, honez gero uste dut amerikarrek ez gaituztela (momentuz) bonbardatuko.

Utzi erantzuna

Zure e-posta helbidea ez da argitaratuko.