Sarean aurki gaitzaten

Meta tag-ak topatzaileetan beharrezkoak

Tag-ak ikustezinak dira nabigatzen ari garenean, baina gure webgunea topatzaile batean ager dadin oso beharrezkoak dira. Modu egokian erabilita, presentzia handiagoa izango du gure webguneak topatzaileen emaitzetan. Ongi erabili ezik, ordea, baliteke gure bila dabiltzanek ere ez aurkitzea.

Topatzaileak, funtsean, gure webgunearen helbidea eta berau deskribatzen duten hitz batzuk jasotzen dituzten datu baseak dira. Baina bakoitzak badu gu aurkitzeko ezinbestekoak izango diren hitz horiek jasotzeko, indexatzeko, modu ezberdina. Badira izenburua eta pantailan ageri den testuaren lehendabiziko hitzak jasotzen dituztenak. Beste batzuek, berriz, izenburua eta guk gure berri ematean topatzailean idatzi beharko dugun laburpentxo bat jasoko dute. Beste batzuek topatzailean jada arloka banatuta dauden azpidirektorioetan bat aukeratzera behartzen gaituzte. Baina gehienek meta tag-ak jasoko dituzte aurkibide-datu base horretan.

Tag-ik garrantzitsuena izenburua da, bertan ageri dena izango baita bilaketan lehentasuna izango duen kontzeptua. Baina badira pantailan ikusten ez diren bi tag oso garrantzitsu: deskribapena eta gako-hitzak. Bata orrialde bakoitzaren laburpen sintetikoa da eta bestea orrialde horretako gaiarekin erlazionatutako hitzen sorta bat.

Kontu handiz eta neurritik pasatu gabe aukeratu behar dira tag horiek eraginkorrak izango badira. Demagun webgune baten baitan euskal sukaldaritzari buruzko orrialde bat badugula, azpian gure lehengusuaren jatetxearen berri ematen duena. Hauxe jarri beharko dugu: . Informazio hau hizkuntza bakoitzean orrialde batean badugu, espazio handiagoa izango dugu laburpena hizkuntza bakarrean jartzeko. Orotara, ez da komeni 200 karaktere baino gehiago jartzea laburpenean.

Gauza bera gertatuko da gako-hitzekin: . Hitzak komaz baina tarterik gabe banatuta. Tag-ak idaztean gogoan izan behar dugu zer idatziko lukeen euskal jatetxe baten bila dabilen internautak.

Behin gure orrialde guztietan tag horiek beteta, topatzailean gure webgunearen berri emango dugu eta ez da beharrezkoa izango denak banan-banan ematea, topatzailearen robotak orrialde nagusitik abiatzen diren beste guztiak aztertuko ditu eta. Halabaina, lehenago, komeni da tag horiek ondo dauden aztertzea. Horretarako, sarean dagoen Meta Medic tresnak online aztertuko dizkigu eta topatzailean aurkituak izateko moduan jarri ditugun esango digu. Bobbyk berriz ezinduentzat eta nabigatzaile zaharrentzat gure orrialdeak duen konpatibilitate maila neurtuko du.

Meta Medic
http://www.northernwebs.com/set/setsimjr.html
Bobby
http://www.cast.org/bobby

Amarauna: Timorko sarraskia
Ekialdeko Timor sarean nonahi

Bertan gertatzen ari den sarraskia dela eta, Timortarrak dira egunotan nazioarteko gai nagusia Interneten. Ehundaka berri talde eta posta zerrendetan gaia eztabaidatzeaz gain, ekintzabide telematikorako bideak ere zabaltzen ari dira sarean.

Lehendabiziko deialdiak Hacktivism webgunetik abiatu dira. Ikuspegi progresista duten hacker ekintzaileen webgune honetan posta zerrenda batek nazioarteko indarrak bidaltzeko eskatzeko mezuen kanpaina jarri du abian, hori egiteko ahalmena duten zenbait agintari eta erakunderen helbideak emanda. Gauza bera egiten du Sapo portal portugaldarrak. Nazioarteko Komunitatea delakoaren pasibitatea eta Nazio Batuen Erakundearen UNAMET-en ezintasuna salatzen duten webguneak kontaezinak dira.

Baina baliteke eraso telematiko gogorragoak antolatzea. Gogoratu behar da erreferenduma baino lehenago Ramos Horta Bakearen Nobel saridunak Indonesiarrak hackerren erasoekin mehatxatu zituela. Hainbat webgunetan ikus daitezke lehenago hackerrek Indonesiari eginiko erasoen irudiak.

East Timor Human Rights Centre-ren (ETHRC) webguneak giza eskubiden alde egiten du Melbournetik. Bertan azpimarratzekoa da torturari buruzko argazki sorta zirraragarria, Indonesiako militarrak ageri baitira timortarrak torturatzen. Besteak beste, larrialdi egoera honetan laguntzeko sarean parte hartzeko modua eta giza eskubideen bortxaketez informatzen duten hainbat txosten eskaintzen dira.

Hacktivism
http://hacktivism.tao.ca/
Sapo
http://canais.sapo.pt/familia/aq/
ETHRC
http://www.gn.apc.org/ethrc/
Indonesia hacked
http://www.2600.com/hackedphiles/eastimor/
http://www.onething.com/archive/timor/timor.htm
Timor Today
http://www.easttimor.com
UNAMET
www.un.org/peace/etimor/etimor.htm

LABURRAK

Agur t'erdi Nabigatzen
NABIGATZEN orrialdearen akabukoa da eskuartean duzun hau. EGUNKARIAren gehigarri berrien agerpenarekin Interneten gaineko orrialdea KZ gehigarritik desagertu eta asteazkenero argitaratuko da, UNInet izenarekin, Unibertsitateaz eta teknologiaz jardungo duen UNI gehigarri berrian. NABIGATZEN 1996ko urriaren 6an abiatu zen, Luis Fernandezen eskutik, Interneten eta euskal internauten komunitatean gertatzen zenari buruz informazioa emateko. Softwarea, internautak, webguneak, gatazkak, konexio arazoak eta beste hainbat gai iragan dira orrialde honetatik. Euskal internauton komunitatea dexente hazi da bitarte honetan eta horren lekuko izan da NABIGATZEN.

Kilometroak 99
Gipuzkoako ikastolen festa urriaren 3an ospatuko da Errenterian, baina lehenago ere zenbait ekitaldi izango dira haren inguruan. Canal 21ren baitan zabaldu duten webgunean informazio hori eta beste asko modu ikusgarrian aurkezten dizkigute antolatzaileek. Besteak beste iraileko kultur agenda dago, festa honetako abestiak mp3 formatoan jaisteko aukera eta Kilometroak 99ko xehetasun guztiak daude bertan.

Kilometroak 99
http://kilometroak99.canal21.com/

Jabi Zabala.