Urria, 2005 hilabeteko artxiboa
Ruper Ordorikaren lehengo eguneko kontzertuan izan nintzen Bilboko Kafe Antzokian. Julen Gabiria bertan izan zen, baita berak bere kronikan aipatzen dituen bere ezagun batzuk ere. Blogariak ere baziren: Obabatxue eta biok, Patxiku eta Gotzon, euskal blogosferaren hurrengo fitxajea. Etiam ere egon zen, baita Jozulin eta Olegario Makarrovsky ere han izan ei ziren, besteak beste, jendetza handia baizegoen. Beste batzuk ia izan ziren baina gerora damutuko zitzaien joan ez izana, ziur. Datorren Blogs&Beers topaketaren aurrerapena zirudien, hainbeste bloggerrekin.
Eta Julenek testuan bikain kontatu duenez gero, nik bertan atera nituen argazki zenbaiten ekarpena egin nahi dut.
Urriak 27, 2005
Astelehenean zendu zen Kike Turmix eta, Patxiren blogean edo Mikel Lizarralderenean (ongi etorri, Mikel) idatzitakoez gain ez dut hemen beste ezer agertuko haren inguruan. Baina gaur biziki haserretu nau EITB24n irakurri dudan informazioak. Bertan “Movida Madrileña” okaztagarri harekin lotzen dute Kike. Ez dute ezer ulertu eta seguruenik infernutik biraoak botatzen ibiliko da Kike hori irakurritakoan.
Gero konturatu naiz, Google News-en bilatuta, agentzia batetik hartu dutela intoxikazioa, ez baitira mobida horretan sartzen duten bakarrak. Kike punk musikaren bultzatzaileetako bat izan zen ‘Movida madrileña’ deritzonaren azken urteetan. Hori egia da, kronologikoki, baina ezer ulertu ez duten batzuek “Rockaren mobidan” egonik “Madrilgo rockaren mobidatik” igarota “Movida madrileñara” pasarazi dute arazorik gabe eta hori ez da egia. El Mundok, adibidez, Europa Press iturritzat aipatuz, errakuntza errepikatzen du bere testuan eta gehienek errepikatzen dute Kike “símbolo del popular barrio de Malasaña en Madrid” zela, izatekotan Madrilen Bilboko enbaxadorea zenean. El Paisekoak Deva Bizkaian jartzen du baina behintzat berari buruzko bestelako datuak ematen ditu.
Norberarentzat pertsonaia ezezaguna eta gaia arrotza izateak ez du justifikatzen agentzietatik copy-paste egitea, albisteak kontrastatu barik. Infografiak direla eta, ez-dakit-nongo saria eskuratuko zutela eta eskuratu zutela aldez aurretik eta gerora ere kriston autobonboa egiten ibili dira EITBkoak, baina horrek ez du balio handirik informazioa ez bada lantzen, bilatzen edo gutxienez kontrastatzen, are informazioa hemengo kontu baten inguruan denean, Espainiako agentzia baten testua bere horretan kopiatu barik.
A! eta ikusten ari naizenez GARAk ere errepikatzen du asuntua. Hemen ez da libratzen inor copypaste-tik, ezta alternatibo eta abertzaleenak ere. Enpin.
Urriak 20, 2005
Iragan asteartean izan genuen eguzki eklipsearen albisteak ustekabean harrapatu ninduen, ez bainuen horren berririk. Hala ere, argazkia atera nion eta Flickr-en jarri dut, beste batzuek ere egin duten moduan. Gogoan dut duela laupabost urte izan genuela azken eguzki eklipsea, baina orduan esan zutenez, 2026 edo 2027. urtera arte ez genuen besterik izango, hori sinistu nuen nik eta horregatik harrapatu ninduen oharkabean lehengo egunekoak.
Nire irudipena da dena Mendeko edo milurteko ekitaldia moduan izendatzeko joera zoroa dugula egun. “A, baina hura erabateko eklipsea izan zen eta hau eraztuna egiten duen horietakoa”, edo horrelako azalpenen bat ematen da beti esku artean darabilgunaren garrantzia azpimarratzeko, ñabardura ttikia besterik ez bada ere.
Baina noiz izan zen aurrekoa? Nire weblogera eginiko lotura batek eman dit pista: duela sei urte idatzitako testua aipatzen baizuen Goienako albiste batek. Horretan ohartu naiz nire gordailuak duen balio dokumentalaz, unean unean sarea nolako garapen mailan zebilen gogoratzeko bidea ematen baitu.
Lagun batek eskatu dit gehiago idazteko, nire testuen monoa duela. Azkenaldion sarean honek nahiko metabolismo geldoa hartu du baina horrek ez nau kezkatzen. Baditut beste blog batzuk elikatzeko eta ezin ditut denak erritmo berean elikatu. Eklipsea? e-klipsea akaso.
Urriak 13, 2005
