'nire i-bilerak' ataleko artxiboak
Edo zergatik ordaindu programa txar bategatik (doako) aukera hobeak egonda?
Ordenagailu berria erostean asko erreparatzen diogu abiadurari: zenbat Megahertz, RAM, bira minutuko… Alde handia dago prezioan plaka xumea jarrita AMD Sempron (edo Intel Celeron) xumea dakarren makinaren eta azken prozesagailua dakarren pepinoaren artean (ez ordea hainbeste erabiltzaile gehienok egingo dugun erabilera emanda). Gauza bera plakarekin eta txartel grafikoarekin, ezta? PC City edo MediaMarkt-eko saltzaile maltzurrak abiadurari buruzko datuak ematen dizkigu eta, honetaz gehiegi ez dakigunez, dendatik 1.200 euro gastatuta aterako gara, Pixar estudioetan erabiltzeko moduko makina daukagula.
Saltzailearen abilidadeaz gain, hemen sarritan oharkabean pasatzen den faktore erabakigarria dago jokoan: erosten dugun makina erosten dugula, gerora ezarriko diogun antibirus softwareak erabakiko du noraino mugatu eta motelduko dugun makina horren ahalmena. Sistema eragileak ere baldintzatzen du (esaterako Windows Vistak makinaren memoria eta lan ahalmena XPk baino askoz gehiago jaten du), baina oraingoan antibirusari erreparatuko diogu.
Aukerarik txarrena irudikatzen jarrita, horrelako misil bati Panda Software ezartzea Ferrari bat erosi eta Seat 600 baten gurpilak ipintzea bezalakoa da nire iritziz. Hainbat antibirus probatuta nago eta hori da egiaztatu ahal izan dudana. Virus.gr webguneak egindako sailkapenean Panda 25. lekuan ageri zen, beste batzuk (tartean doako antibirusen bat) askoz hobeto ageri ziren bitartean.
Orduan zergatik erosten du Panda jendeak? Ezjakintasunagatik eta hemengoa delako, punto. Hemengoa izate horrekin nazkatu xamar nago, Euskaltelek bezala hemengo enpresa horiek eskatu bai, atxekimendua eskatzen digute, bandera (ez dakigu zein) harrotzen digute, baina abantailak ez dira inondik ere ikusten… Azkenean gure dual core indartsua kafetera bihurtzen da Panda atzealdean lanean ari delako, arazoak sortzen dira sareetara konektatzeko, hainbat programa erabiltzeko… Ez aipatzeagatik uneoro ageriko zaizkigun ohar intrusibo bezain alferrekoak.
…Eta gainera ederki kobratu egiten digute, bai, hemengoontzat abantaila handirik ez, beraz. Alternatibak badaude ere, ezagunenetako batzuk Panda bezain txarrak dira gutxienez: McAfee, Norton… Fuera! Azterketa gehienetan Kaspersky goian ageri da eta bere erabiltzaileak orokorrean oso pozik daude berarekin. Ez da asko nabaritzen, detekzio mailarik onenak ditu… Dudarik gabe dendetan daudenen artean onena da Kaspersky eta ordainduzkoen artean bera eta Nod32 omen dira onenak.
Doako aukerak hobeto
Baina doako alternatibak ere badaude. Esaterako, gezurra badirudi ere, oraintsu arte AOLk Kasperskyren doako bertsio bat banatzen zuen Active Virus Shield goiburupean. Hori da nik instalatuta daukadana eta, benetan, telebistako konpresa eta tanpoi miragarri horiek bezalakoa da: ez zara instalatuta daukazula konturatzen. Alabaina, Kasperskyrekiko tratua abuztuan hautsi eta McAfee bihurtu da orain AOLk ematen duena. Nahi duenak hor dauka McAfee ordaindu barik eskuratzea, firewall eta guzti.
Baina nik erregalatuta ere ez nuke McAfee erabiliko, beste alternatiba batzuk ere badirelako. Batzuek Antivir darabilte eta AVG beste hainbatek eta, orohar, iritzi onak irakurri ditut hauen gainean, doakoak direla kontutan hartuta. Hala ere, doako antibirusen artean nire aukera une honetan Avast! antibirusa da. Gaztelaniaz edo frantsesez instalatu dezakegu eta ez du makina gehiegi moteltzen. Aurrekoek bezala, eskatzen diguten bakarra e-posta helbide bat da (erregistroko gakoa bidaltzeko) eta, erabilera ez komertziala egingo dugula ziurtatzen badiegu, urtebeteko doako harpidetza izango dugu, eguneraketak-eta arazorik gabe eskuratuz.
Beraz, doako beste zenbait antibirus ere badiren arren (BitDefender ez zitzaidan batere gustatu), nik azken hiru aukera hauek hartuko nituzke kontutan (hirurak probatu ditut, baita aurretik aipatu ditudan guztiak ere). Hala ere, besteen esperientziak ere kontutan hartzekoak direnez, bakoitzak konta dezala berea. (Ohar bedi irakurlea Windows sistemaz ari garela, birusak garatzen diren ur zikinen inguruneaz alegia).ç
Buzzin in my head: Dancing in the moonlight (King Harvest)
Urriak 10, 2007
Atzo argazki erakusketa zabaldu zuten Mexikotik etorritako lagun bik, Eduardo Vera eta Frida Hartz izan ziren, bakoitza bere argazkiak ekarrita, Bilboko Hikateneon bizpahiru egunerako paratu duten erakusketa zabaltzen eta azalpenak ematen. Eduardo lehendik ezagutzen nuen, baita bere Chiapas-eko argazkiak ere. Frida Hartz, berriz, azken hamarkadotan Ertamerikan izan diren gatazka eta une historiko garrantzitsuen lekuko izan da eta estreinakoz dago gurean.
Mexikon fotokazetaritzaren munduan erreferentzia interesgarrienetakoa da Frida eta inguruko gatazketako une erabakigarri zenbait islatu ditu bere argazkien bidez. Esaterako, 1985ean Mexiko DFko lurrikara bertatik bertara jaso zuen, bera sortzez hiriburukoa baita. Handik hiru urtera jada La Jornadako argazkilaritza saileko buru zen, 1991ean FMLNrekin zegoen Cerro Guazapan eta Uzulatan-en; 1994ko urtarrilean Chiapas-eko hiriburuan zen matxinatu zapatistekin. Berea da Marcos zaldi gainean ageri den argazki hau, Kordak eginiko Che Guevararena gogora ekartzen duen erretratu ikonikoa.
Bilbon egon ondoren Gernikako gaztetxean (bertan izango den hackmeeting-ak iraun bitartean), Ermuan eta beste lekuren batean izango dira Fridaren eta Eduardoren argazkiak. Ez galdu aukera.
Eguneraketa: Egunotan, urriaren 18tik 28ra Bilboko Gabriel Aresti euskaltegiko karrajuan (Done Bikendi 2, 4. solairua) ikusi ahal izango dira argazkiok, Kafe Antzoki gainean.
Urriak 9, 2007
Denborak eta distantziak ezjakintasuna sakondu egin dute eta euskaldunok Amerikako lur eta jendeekin lotzen gintuzten estatxa sendoak hari mehe bilakatu. Esaterako, hainbat milioi lagun dabiltza Atlantikoaren bestaldean euren abizena euskalduna dela jakin barik.
Urruntze horren adibide barregarria aurkitu dut Mexikoko Durango hiriaren webgune ofizialean, hiriaren historia azaltzen duen orrialdean. Izen bereko estatuko hiriburua da egun, garai batean lurraldeak Nueva Vizcaya izena eduki bazuen ere.
En el año de 1552, cuando el capitán español Ginés Vázquez del Mercado hallo el cerro que desde entonces lleva su nombre. Los españoles tuvieron aquel acontecimiento como el descubrimiento de esta comarca, aun cuando por ella habían pasado hacia 1535 los capitanes Cristóbal de Oñate y José de Angulo, procedentes de las sierras de Topia, habiendo obrado la circunstancia de que la mayoría de los españoles que acompañaban en su expedición a Vázquez del Mercado eran naturales de Vizcaya, España, dieron a la región descubierta el nombre de Nueva Vizcaya.
Para dar ese nombre a la comarca de Durango influyeron también las siguientes circunstancias. Primero: que el valle donde se encuentra el cerro de Mercado tenia semejanza con el valle del Guadiana que existe en la provincia de Vizcaya, razón también por la que el valle primeramente mencionado le dio ese nombre. Segunda: que en la repetida provincia española de Vizcaya existen algunas minas de fierro, lo cual venia a completar la analogía de esta con aquella provincia. Por otro lado, gran parte de los soldados que después vinieron en la expedición del capitán Francisco de Ibarra que formalizo la conquista de la región, eran vizcaínos.
Fundada la capital con el nombre de villa de Guadiana el 14 de abril de 1563 por el comisionado de Ibarra, capitán Alonso de Pacheco, fue después, el 8 de julio de aquel año, declarada formal y legítimamente fundada por el capitán Francisco de Ibarra, quien le puso por nombre villa de Durango, a fin de que la semejanza de este valle de Guadiana con el que se encuentra en España fuera completa, pues en este ultimo existía una villa llamada de Durango.
Durangoko armarria Bizkaiko bera da, haritza eta haro familiaren otsoak eta ardiak barne. Normala da Nueva Vizcaya zenaren hiribururako, baina azalpen ofiziala mundiala da:
Es, pues, explicable que al darse escudo a la ciudad mexicana de Durango, se procurara mantener la analogía que se había venido procurando, y así, le dieron un escudo muy semejante al de la villa de Guernica, de la provincia de Vizcaya en España. Este escudo constaba de un árbol cuyo tronco sale se ven dos coyotes llevando cada cual en el hocico una liebre, y bajo el tronco, en el lugar que correspondía a la raíz, ostenta un león. Hori bai egokitzapena, bertako faunarako, noski.
Bizkaiko armarria Havana Club ron ospetsuaren etiketan ere aurki dezakegu, produktu hori Arechabala sendi bizkaitarrak sortu baizuen Cardenasen. Egungo Arecha ronaren etiketetan ere ikus daiteke armarria eta Arechabalatarren historia bitxia hemen irakur daiteke.
Urriak 2, 2007
Espainiako epaileak ere izan ziren Batasunaren webgunea ixteko agindu zutenak. Orain El Juevesekin gertatu da. Teknikoki eta juridikoki zentsuratze hori nolakoa izan den jakin nahian ibili naiz eta inon ez dago azalpen handirik. Hemen behintzat, deskonexioa aldizkarikoek eurek egin dutela agertzen da, poliziek delitua egiten ari zirela jakinarazi eta gero. Baina zer gertatzen da zentsuratuak bere webgunea kentzen ez badu? Zentsuragaitza da sarea? Espainian egun oso erraza da webgune bat zentsuratzea, tamalez. Garai batean ISP mordoa zegoen estatuan, zailagoa izango zen denak banaka-banaka konfiguratzea webgune jakin baterako sarbidea galarazteko. Gaur egun, ordea, dozena erdi telefonia enpresek ematen digute sarbidea. Nahikoa dute Telefonica, ya.com, Jazztel, Orange eta Onori zentsuratzeko agintzea praktikan zentsura hori ia erabatekoa izan dadin, zentsuratuak bere webgunea saretik kendu ez badu ere.
Ni neu beti TMEOkoa izan naiz, askoz basatiagoa baita baina inoiz ez diote horrelakorik egin. Zergatik? Fiskal askok ez dutelako ezagutzen eta ez delako hain famatua. Argi esan dute El Juevesekoek ere: orain arte askoz gogorragoak atera izan ditugu eta ez da ezer gertatu: Zergatik oraingoan? Azalean agertu delako. Letiziaren izaera sakratua atzera-eraginezkoa izango da?
Uztailak 23, 2007
Lehengoan Googleri buruzko dokumental interesgarria eman zuten Mundo.hoy saioan. Badira Googleri buruzko bestelako erreportaiak, bertan lan egiten dutenen gainean (bideoak) edo bertako bizimoduaren (El Pais) inguruan. Ohi bezala, dokumental interesgarria da. Bertan Vint Cerf eta Googleko jendea agertzen da, baita Googlerekiko kritikoak direnak, Archive.org-eko Brewster Kahle eta beste hainbat. Googlek sareko edukiak nola indexatzen dituen, nola nabarmentzen dituen lotura batzuk bilaketen emaitzetan, barruko algoritmoen gaineko azalpenak, Google adwords nola antolatu duten… Beste gai batzuren artean Google earth eta liburuen digitalizazioa ere azaltzen dira. Nahiko interesgarria eta gaira hurbiltzeko aproposa El mundo segun Google edo Google: Behind the Screen ingelesezko jatorrizko izenburuan.
Uztailak 18, 2007
Galdakaoko lurretan zegoen Bilboko jolas parkea. Instituzioek baztertua, bilbotarrek ahaztua, hemen dago oraindik haren hilotz ugertua. Lehengo egunean, hainbat urte pasa ostean, txiripaz pasatu nintzen handik. Horrelako tokiak, masentzako sortutak baina aspaldi abandonatuak, oso zinematografikoak dira. Begira bestela Coney Island-en zenbat film egin diren… Baina Bilboko jolas parkea biziki erakargarria egiten zait, gure txikitako oroimenek handiagotzen baitute bertan bizi izandako ilusioen eta egungo herdoilaren arteko amildegia.
Planeta inopiak Flickr-en jarri du aspaldiko argazki eskaneatua, eta gogoratu egin digu berriki Standard taldeak bideoklipa grabatu zuela bertan. Zirraragarria auditorio erraldoi abandonatua ikustea, belar zaharrak nonahi eta dena oihanak janda, telefono kabina zaharra… Orain galderak datozkit: norena da lur zati hori (Aldundiarena dela uste dut) eta zer egiteko asmoa dute bertan?
Uztailak 13, 2007
Gil Scott-Heron poeta eta kantari iraultzaile amerikarrak asmatu eta hedatu zuen The revolution will not be televised leloa 1971an argitaratutako aldarrikapen kantuaren bidez. Hona hemen abestiarekin eta hainbat irudirekin osatutako bideo bat. Canongate Books-ek argitaratutako Now and Then bildumarako egindako promozio bideoa da:
Interneten garaia geroago heldu da eta, komunikabiden arteko kategorizazio zurrunak alde batera uztearekin batera, iraultza telebistaz (Scott-Heronek aipatu nahi zituen boteretsuek kontrolatutako mass media) baino, komunikabide alternatiboen bidez hedatzeko aukera dago. Hain zuzen ere, goiburu bera du Venezuelan Chavezen aurkako estatu kolpe saiakeraren alderdi mediatikoari erreparatzen dion dokumentalak.
Gainera, Venezuelan bertan dauka egoitza nagusia satelite bidezko Telesur telebista bolibartarrak. Tamalez, ordea, zuzeneko emisiorako hartu duten inperioaren Windows Media sistemak ez du seinalea behar bezain ongi igortzen. Aukera ona zuten VLC edo horrelako sistema libre bat bultzatzeko zuzeneko emisioak etsaiaren softwareare eskasarekin egin ordez.
Satelite bidez orain Europan ikus daiteke Telesur (hemen jarraibideak). Kodifikatu gabeko seinalea da, NSS 806 sateliteak igortzen du eta Euskal Herrian hego-mendebaldera begira jarri behar da antena (230º gutxi gora behera) Satelite hori harrapatzeko. Hori bai, 120 zentimetrotik gorako diametroa duen antena behar ei da seinalea ondo hartzeko.
Uztailak 8, 2007
Lehengoan Antton Alberdiren mezua jaso nuen euskalnatura.net eta haren barruan dagoen Tantaka-tantaka bloga ezagutzeko gonbidapenarekin. Bereziki interesgarria bertan jarri duen bideoa. Afrikako Kruger parkean filmatutakoa da eta bertan, txiripaz, bizitzako kontakizun lazgarri eta bitxia harrapatu zuen bisitari batek bere kamerarekin. Ez dizuet gehiago kontatuko, bisita ezazue bloga eta bertan aurkituko duzue bideoa.
Buzzin in my head: Pun-ba-pa (Niko eta Dominika Etxart, Robert Larrandaburu).
Uztailak 3, 2007
Lehengoan elkarrizketa egin genion irratia.com-en Ana Courier avatar-ari, bere bigarren bizitzako ibileren inguruan. Bada, igandean bertan beti interesgarria izaten den Mundo.hoy saioan Second Life izan zuten hizpide. Nik USB bidezko TDT deskodetzaile erosi berriak nola grabatzen duen probatu eta gero, esperimentua egin dut flash videora pasatzeko eta hemen duzue emaitza.
Gigabyte bateko bideoa Riva FLV Encoder programatik pasatu dut, 360 Kbps-era kodifikatuz. Emaitza 156 MBeko artxiboa da, astuna baina FTP bidez igotzeko modukoa. Ondoren, Wordpressen, nire hostingak automatikoki instalatu didan WP-FLV plugina erabiliz txertatu dut hemen 400×300 neurrian. Ikusteko banda zabala ezinbestekoa da, baina akaso 160 Kbps-era jarrita ere ondo ikusiko litzateke, probak egitea izango da kontua…
Ekainak 19, 2007
Harrituta utzi nau. Aspalditik mac erabiltzaileak garenok (eta aspaldi mac-eroak ginenok), Steve Jobs-en figura ezagutzen dugu, Macintosh-en Think different pentsamoldearen bultzagilea. Urte askoan Gates Goliath-aren aurka borrokatu den David interesgarriagoa, alternatiboagoa, inteligenteagoa, cool-agoa… Berak sortutako Apple konpainiatik bota zuten eta handik urte batzutara berriro bueltatu zen (ikus duela 10 urteko erreportaia), iMac-a besapean, sorkuntzaz eta imaginazioaz ezer ez zekiten exekutiboek galbidean jarritako enpresa salbatzera. Bitartean Pixar estudioak sortuak zituen eta gerora, iPod-iTunes arrakastatsuaz gain hainbat mugimendu eraginkor eta itun bitxi egin ditu, Apple egonkortasunera eramanez. Sortzaile eta kudeatzaile arrakastatsua dela erakutsi du.
Baina Stanford-eko ikasleen aurrean egindako berbaldi honetan Jobs-ek bere bizitzako hainbat xehetasun kontatzen ditu. Amak abandonatu zuen jaio berritan, sekula ez zituen ikasketak burutu… Pertsona ezagutuko dugu eta nola bere bizitzan egindako hainbat hautuk eragina izan duten gerora…
Bigarren zatia gero…
Ekainak 15, 2007
Hurrengo idatziak
Aurreko idatziak
